Токара оролларида уч ҳафтада 2000 дан ортиқ зилзила юз берди
Қутқарувчилар ва олимлар ҳудуддаги вазиятни диққат билан кузатмоқда.
Япониянинг жанубида жойлашган Токара оролларида сўнгги уч ҳафта ичида 2000 дан ортиқ ер силкиниши қайд этилди. Бу ҳақда Япония Миллий метеорология бошқармаси хабар берган.
21 июндан бери Акусекижима ва Кодакаражима атрофида сейсмик фаоллик кескин ошган. Айрим зилзилаларнинг магнитудаси 5,0 дан юқори бўлган. 2021 ва 2023 йилларда ҳам шунга ўхшаш ҳолатлар кузатилган, аммо бу сафар силкинишлар сони ва кучи сезиларли даражада кўпроқ.
Айни пайтда зилзилалар натижасида қурбонлар ёки вайронагарчиликлар ҳақида маълумот йўқ. Мутахассисларнинг таъкидлашича, бу ҳудуд ер пўстининг ҳаракатдаги литосфера плиталари туташган нуқтасида жойлашгани учун бундай кучли сейсмик фаоллик кузатилмоқда.
Токара оролларида ҳозирда 650 га яқин одам яшайди. Уларнинг бир қисми ихтиёрий равишда бошқа шаҳарга эвакуация қилинган.
