Кўкдаладаги фожиада ҳалок бўлган ҳар бир фуқаро оиласига 100 миллион сўм берилади
Жароҳатланганларга эса 50 миллион сўмдан ажратилади.
2025 йил 16 июль куни Кўкдала туманининг "Олтин дала" маҳалласида газ тарқатиш шаҳобчасида ёнғин содир бўлган. Расмий маълумотларга кўра, ёнғинда 4 киши ҳалок бўлган, шунгдек 20 дан ортиқ одам жароҳатлангани айтилган.
Давлатимиз раҳбари топшириғига кўра, ушбу ҳодисада жабр кўрган фуқароларга моддий ёрдам ажратилди. Жумладан ёнғинда ҳалок бўлган фуқароларнинг оилаларига 100 миллион сўмдан, жароҳат олиб ҳозирда даволанаётганларга эса 50 миллион сўмдан нақд пул шаклида компенсация тўлаб берилди.
Компенсация маблағлари туман ҳокими ва бошқа ҳокимлик масъуллари иштирокида бевосита фуқароларнинг хонадонлари ва даволанаётган жойларига етказиб берилди. Шунингдек, жароҳатланган фуқаролар тўлиқ соғайиб кетгунига қадар малакали шифокорлар томонидан бепул тиббий хизмат билан таъминланади.
Бундан ташқари, даволаниш жараёнида дори-дармон харажатлари ҳам тўлиқ давлат томонидан қопланиши маълум қилинди. Ҳозирда воқеа юзасидан зарурий ёрдам ва қўллаб-қувватлаш ишлари давом этмоқда.
