Машҳур санъаткор Ўзжан Дениз молиявий инқирозга дуч келди
22 йиллик ҳамкорлик барбод бўлди: Ўзжан Дениз ва акаси ўртасидаги можаролар энди судда кўрилмоқда.
Туркиялик машҳур қўшиқчи, актёр ва режиссёр Ўзжан Дениз молиявий ва ҳуқуқий инқирозга дуч келмоқда. Унинг барча мулклари суд қарори билан вақтинча музлатиб қўйилди.
Бу ҳолат, “Haberler.com” нашрининг ёзишича, санъаткорнинг 22 йиллик менеджери ва катта акаси Эржан Дениз билан юзага келган зиддиятлар фонида юз берди. Узоқ йиллар давомида бирга ишлаган ака-ука ўртасида сўнгги йилларда жиддий келишмовчиликлар бошлангани, ҳатто бу алоқалар суд жараёнигача бориб еткани айтилмоқда.
Авваллари саҳна ортида елкама-елка туриб фаолият юритган икки ака-ука ўртасидаги ишбилармонлик алоқалари тугагач, мулкий низолар, ҳужжатлар билан боғлиқ тортишувлар ва ўзаро таҳдидлар юзага келган. Натижада, суд Ўзжан Денизнинг барча активларини вақтинча музлатиб қўйиш ҳақида қарор чиқарди.
Таниқли санъаткорнинг оилавий муаммолари энди жамоатчилик эътиборида бўлиб, бу можаро фақат шахсий доирадаги келишмовчилик эмас, балки йирик молиявий тортишувга айлангани таъкидланмоқда.
