Сенат чиқинди қарздорлиги сабабли электрга тўлов қилолмаслик механизмига қарши чиқди
Тизимлараро интеграция йўқлиги, шартнома муаммолари ва ахборот ноаниқлиги аҳоли норозилигига сабаб бўлмоқда.
Ўзбекистон Республикаси Сенатининг Аграр, сув хўжалиги масалалари ва Экология қўмитаси чиқиндиларни йиғиш ва олиб чиқиш хизматлари соҳасидаги тўлов интизоми ҳамда қонунчилик ижроси юзасидан мавжуд муаммоларга эътибор қаратди. Қўмита мутасадди вазирлик ва идораларга аниқ саволлар билан мурожаат қилди.
Сенатга кўра, "Ҳудудий электр тармоқлари" АЖга қарашли HET мобил иловасида аҳолининг чиқинди хизматлари бўйича қарздорликлари кўрсатилмаяпти. Бу эса электр энергияси учун тўловни тўхтатиш механизмини шубҳа остида қолдирмоқда. Чунки “Тоза макон” электрон биллинг тизими билан HET тизими ўртасида тўлиқ интеграция йўқ, айрим истеъмолчиларда чиқинди хизмати бўйича умуман шартнома мавжуд эмас, ҳисоб рақамларида эса аниқлик етишмайди.
Маълумот учун, 2024 йилги қонунчилик ўзгаришларига биноан, 1 августдан бошлаб чиқинди хизмати учун қарздор истеъмолчилар ҳар ойнинг 5-санасигача СМС-хабар олади. Қарзни 5 кун ичида тўламаган тақдирда, электр энергияси учун тўловни амалга ошириш имконияти вақтинча тўхтатилади.
Бироқ иқтисодчи Отабек Бакиров ушбу тартиб жорий этилишидан аввал зарур техник ва ҳуқуқий асослар тўлиқ ишлаб чиқилиши кераклигини таъкидлаган эди.
Шунингдек, Сенат Экология, атроф-муҳитни муҳофаза қилиш ва иқлим ўзгариши вазирлиги ҳамда Энергетика вазирлигидан мавжуд носозликларни аниқлаб, уларни бартараф этиш бўйича аниқ амалий таклифлар тақдим этишни сўради.
Янги тартиб, чиқинди хизматларидаги аниқ бўлмаган қарздорликлар фонида, аҳолида эътироз ва норозиликларни келтириб чиқаряпти. Сенат эса масалага жиддий ёндашиб, тизимлараро узвий алоқани йўлга қўйишни талаб қилмоқда.
