Фарғона канали нега кўпикка тўлди?
Прокурор топшириғи билан махсус ишчи гуруҳ тузилиб, экологик ва санитария талаблари бўйича ўрганиш ишлари олиб борилмоқда.
Ижтимоий тармоқларда Жанубий Фарғона каналининг Булоқбоши туманидан ўтувчи қисмида сув юзасида кўпиклар пайдо бўлгани ҳақидаги хабарлар тарқалганидан сўнг, мазкур ҳолат Андижон вилояти прокуратураси томонидан назоратга олинди.
Аниқланишича, ҳодиса рўй берган куни каналнинг Булоқбоши туманидан ўтувчи қисмларида ҳақиқатдан ҳам сув юзасида кўпиклар кузатилган.
Вилоят прокурорининг топшириғига биноан ҳолатни ўрганиш ва тегишли чораларни кўриш мақсадида Экология, атроф-муҳитни муҳофаза қилиш ва иқлим ўзгариши бошқармаси, Фавқулодда вазиятлар бошқармаси, Санитария-эпидемиология осойишталик ва жамоат саломатлиги хизмати ҳамда бошқа мутасадди ташкилотлар вакилларидан иборат Ишчи гуруҳ ташкил этилди.
Мазкур гуруҳ томонидан сувдан намуна олиниб, белгиланган тартибда лаборатория текширувларига юборилди. Ҳолат юзасидан батафсил маълумотлар экспертиза хулосаларига кўра қўшимча эълон қилинади.
