Тошкентда электр авариялари сабаб 28 нафар мансабдор жазоланди
Ўрганиш давомида тизимда муаммолар борлиги маълум бўлган.
24−25 июль кунлари Тошкент шаҳрининг турли туманларида электр энергияси таъминоти билан боғлиқ авариялар ҳамда тармоқларда кучланишнинг пасайиб кетиши кузатилди. Ҳолат Бош прокуратура томонидан мутахассисларни жалб этган ҳолда ўрганилди.
Ўрганиш давомида чекловлар ва авариялар ҳақида истеъмолчиларни вақтида хабардор қилиш талаб даражасида ташкил этилмагани аниқланган. Июль ойининг 23-кунида 64 та авария бўйича истеъмолчилар огоҳлантирилмаган, 112 таси бўйича эса кеч огоҳлантирилган.
28 нафар (“Тошкент шаҳар электр тармоқлари” МЧЖ бошлиғи ва 11 нафар туман электр таъминоти корхоналари бошлиқлари, 13 нафар туман корхонаси бош муҳандислари, 3 нафар туман корхонаси диспетчерлик хизмати ходимлари) мансабдор шахс интизомий жавобгарликка тортилган.
Шунингдек, “Тошкент шаҳар электр тармоқлари” масъулияти чекланган жамиятида тизимли муаммолар борлиги маълум бўлган.
Қайд этилишича, жамиятнинг 410 нафар ишчи-ходимдан иборат 78 та авария бригадаси, 34 та махсус автотранспорт воситаси юзага келаётган авария ҳолатларини бартараф этиш учун етарли эмас. 35 та штат бирликларига эҳтиёж мавжуд.
