Андижонда бола ўғриси ушлангани айтилмоқда
Вилоят ИИБ у руҳий носоғлом шахс эканини билдирди.
Ижтимоий тармоқларда Андижон вилоятининг Шаҳрихон туманида бола ўғриси ушлангани айтилган видео тарқалганди. Ҳолат юзасидан вилоят ИИБ расмий муносабат билдирди.
Қайд этилишича, ушбу видеохабарда акс этган ҳолат юзасидан Андижон вилояти ИИБ томонидан ўрганиш ишлар олиб борилган.
Маълум бўлишича, жорий йилнинг 31 июль куни соат 15:40 ларда “102” қисқа рақамига Шаҳрихон тумани, Чўжа маҳалласида яшовчи фуқаро Ўринбоев Ғанишер томонидан яшаш хонадонига номаълум шахс кириб олганлиги тўғрисида хабар келиб тушган.
Мазкур хабар юзасидан ҳудуд профилактика инспектори зудлик билан воқеа жойига бориб, ҳолатга ойдинлик киритганда, ушбу фуқаро Шаҳрихон тумани Бўстон МФЙ Янги қадам кўчасида яшовчи, 2019 йилдан буён рухий касалликлар (Д) рўйхатида турувчи фуқаро эканлиги аниқланган.
Ушбу фуқаро ҳудуд профилактика инспектори томонидан шу куннинг ўзида Андижон вилояти психоневрология диспансерига даволаниш учун жойлаштирилган.
