Фарғонада 24 ёшли йигит собиқ севгилисининг эрининг қариндошини пичоқлади
Ресторандаги учрашув жанжалга айланиб кетган ва у жабрланувчига оғир тан жароҳатлари етказган.
Фарғона вилоятининг Бувайда туманида юз берган можаро жиноят билан якунланди. Суд 24 ёшли эркакни қасддан одам ўлдиришга уринишда айбдор деб топиб, уни саккиз йил муддатга умумий тартибдаги колонияда озодликдан маҳрум қилди. Бу ҳақда Фарғона вилояти судлари маълум қилди.
Иш тафсилотларига кўра, айбланувчи турмуш қурганидан кейин ҳам собиқ севгилиси билан муносабатларни давом эттирган. Аёлнинг эри бу ҳолатни билиб қолганидан сўнг томонлар ўртасида кескин душманлик юзага келган. Қариндошларнинг ҳам аралашуви можарони янада кучайтирган.
Аёлнинг акаси айбланувчини кўришиш учун чақирган. Бироқ ресторанда ўтказилган суҳбат икки тараф ўртасидаги жанжалга айланиб кетган.
Тергов маълумотларига кўра, можаро чоғида айбланувчи автомобилдан пичоқ олиб, собиқ севгилисининг эрининг қариндошига бир неча марта зарба берган. Жароҳатлар жабрланувчининг кўкрак, сон ва қорин қисмига етган. Ҳодисада иштирок этганлар ҳужумчига тўсқинлик қилганлари боис жабрланувчи омон қолган.
Суд ҳолатларни ўрганиб, жиноятни Ўзбекистон Жиноят кодексининг қасддан одам ўлдиришга уриниш сифатида баҳолади ва айбланувчига саккиз йил озодликдан маҳрум қилиш жазосини тайинлади.
