Улар 35 йил урушди ва энди улар дўст – Трамп

Вашингтондаги Оқ уйда АҚШ президенти Дональд Трамп ҳузурида Арманистон бош вазири Никол Пашинян ва Озарбайжон президенти Илҳом Алиев ўртасида 30 йилдан ортиқ давом этган можарони тугатишга мўлжалланган АҚШ воситачилигидаги тинчлик битими имзоланди.

 

Битим шартларига кўра, Озарбайжонга унга тегишли эксклав Нахчивонга эркин кириш имконини берувчи стратегик “Зангезур транзит йўли” — “Trump Route for International Peace and Prosperity” очилади. Ушбу йўл орқали темирйўл, қувур линиялари ва оптик толали коммуникациялар ҳамда энергия тармоқлари ўтказилиши кўзда тутилган. Йўл 99 йиллик ижарага АҚШга берилади ва АҚШ назоратидаги консорциум томонидан ривожлантирилади.

 

Бундан ташқари, Арманистон билан Озарбайжон АҚШ билан энергетика, технология, савдо ва мудофаа ҳамкорлиги бўйича қўшимча битимлар имзолади. Шунингдек, АҚШ орқали Россиянинг минтақадаги нуфузи камайиб бораётгани таъкидланди. Иккала етакчи — Пашинян ва Алиев — Трампни тинчлик бўйича Нобел мукофоти учун номзод қилиб кўрсатишга тайёр эканликларини билдирди.

 

Аммо экспертлар бу битимнинг амалий натижа бериши учун узоқ муддатли АҚШ иштирокига боғлиқ эканлигини, битим инсон ҳуқуқлари, Нагорний Қорабоғдаги кўчирилган аҳоли масаласи каби муаммоларни ҳал этмаганлигини таъкидламоқда.