AI-92 бензин нархи арзонлашди
Бухоро нефтини қайта ишлаш заводида ишлаб чиқариш жараёнлари оптималлаштирилиб, биржа нархи пасайтирилди.
Давлат раҳбарининг аҳолига арзон ва сифатли ёқилғи маҳсулотларини етказиб бериш бўйича топшириқлари ижроси доирасида Бухоро нефтини қайта ишлаш заводида AI-92 русумли автобензин нархи босқичма-босқич камайтирилди. “Ўзбекнефтгаз” АЖга кўра, бу чора ички ёқилғи бозорини барқарорлаштириш ва истеъмолчилар манфаатларини қўллаб-қувватлашга қаратилган.
Компания стратегияси доирасида ишлаб чиқариш жараёнлари оптималлаштирилди, таннархни камайтириш бўйича комплекс чора-тадбирлар амалга оширилди. Натижада ишлаб чиқариш ҳажми ошиб, нарх пасайишига эришилди.
Бухоро НҚИЗда ишлаб чиқарилган AI-92 автобензиннинг биржа савдоларидаги 1 тоннаси бошланғич нархи 12 млн 881 минг сўмдан 12 млн 628 минг сўмга туширилди. Бу эса бир литр AI-92 бензиннинг биржадаги бошланғич нархи 9 400 сўмни ташкил этишини билдиради.
“Ўзбекнефтгаз” АЖ маълум қилишича, юқори октанли ёқилғи нархларини босқичма-босқич пасайтириш ишлари давом эттирилади. Мутаҳассисларнинг фикрича, бу қарор нафақат истеъмолчиларга қулай шарт-шароит яратади, балки бутун ёқилғи бозорига ижобий таъсир кўрсатади.
