Россия мактабларида мигрант ўқувчиларнинг хатти-ҳаракатлари алоҳида кузатувга олинади
Ўқитувчилар ёзма ишлар, суҳбатлар ва аноним сўровлар орқали ўқувчиларнинг фикрларини ўрганади.
Россия Таълим вазирлиги, Ички ишлар вазирлиги ҳамда Фан ва олий таълим вазирлиги ҳамкорлигида мигрант болаларнинг фикри ва хулқ-атворини мониторинг қилиш бўйича услубий тавсиялар ишлаб чиқилди.
Oxu.Az’нинг “Ведомости” нашрига таяниб хабар беришича, ҳужжатда ўқитувчиларга ўқувчиларнинг қонунбузарликка мойиллиги, тарихий хотира, анъанавий қадриятлар ва давлат рамзларига ҳурматсизликни ифодаловчи фикрлар мавжудлигини аниқлаш учун уларнинг ёзма ишлари ҳамда кундалик ифодаларини кузатиш тавсия этилади.
Шунингдек, муҳожир болаларнинг “Муҳим суҳбатлар” дарсларига муносабати, сиёсий, ижтимоий ва диний мавзулар бўйича радикал қарашлар ёки муросасизлик ҳолатлари аниқланса, тегишли чоралар кўрилиши белгиланган.
Тўлиқроқ маълумот олиш мақсадида ўқитувчиларга норасмий шароитларда индивидуал суҳбатлар ва аноним сўровлар ўтказиш ҳам тавсия этилган.
