Тожикистонда фолбин ва сеҳргарларга борганлар жарима тўлайди
Агар шахс бир йил ичида фолбинлик ёки сеҳргарлик билан қайта шуғулланса, бу жиноят сифатида баҳоланади.
Тожикистонда энди фолбин ва сеҳргарлик хизматларидан фойдаланган фуқаролар маъмурий жавобгарликка тортилади. Душанбе шаҳар Ички ишлар бошқармаси маълум қилишича, маъмурий ҳуқуқбузарликлар тўғрисидаги кодексга киритилган янги қўшимчалар билан бундай амалиётга жалб қилинганларга жарима солиш тартиби жорий этилган.
Янги қоидаларга кўра, фолбин ёки сеҳргарга мурожаат қилган шахсларга ҳисоблаш кўрсаткичининг 50 (3 750 сомони)дан 60 (4 500 сомони) баробаригача жарима солинади. Ички ишлар органлари фуқаролардан қонунбузарликдан тийилишни сўраб, бу каби ҳолатларнинг олдини олишда полиция билан ҳамкорлик қилишни тавсия қилмоқда.
Амалдаги қонунчиликка мувофиқ, агар шахс бир йил ичида фолбинлик ёки сеҳргарлик билан қайта шуғулланса, бу жиноят сифатида баҳоланади. Шу билан бирга, тегишли модда бўйича қандай жазо чораси қўлланиши аниқ белгиланмаган.
Тожикистонда фолбин ва сеҳргарларга қарши мунтазам рейдлар ўтказилади, бу эса жамиятни ноқонуний амалиётлардан ҳимоя қилиш ва фуқароларни огоҳлантиришга қаратилган чора сифатида кўрилмоқда.
