Жиззахда солиқ қарзи туфайли метан заправка хатланди
МИБ маълумотига кўра, қарз миқдори 324 млн сўмни ташкил қилади.
Жиззах вилоятида солиқ ва бошқа мажбурий тўловларни ўз вақтида амалга оширмаган тадбиркорлик субъекти мол-мулклари давлат ижрочилари томонидан хатланди.
Вилоят солиқ бошқармасининг қарорларига асосан “B.H” МЧЖга тегишли 324 миллион сўмдан ортиқ солиқ қарзини ундириш юзасидан ижро ҳужжатлари Бош прокуратура ҳузуридаги Мажбурий ижро бюросининг Шароф Рашидов туман бўлимига юборилган.
Мазкур қарздорликни қоплаш доирасида корхонага тегишли ҳисоб рақамлари банд қилинди, шунингдек, фойдаланилмаётган метан заправка иншоотлари хатланиб, назоратга олинди.
Мутасаддилар таъкидлашича, агар қарздорлик белгиланган тартибда тўлиқ ундириб бўлинмаса, мазкур объект аукцион савдоларига чиқарилади ва тушган маблағ давлат бюджети ҳамда бошқа мажбурий тўловларни қоплашга йўналтирилади.
Ушбу чора давлат молиявий интизомини мустаҳкамлаш, солиқ тўловлари бўйича масъулиятни кучайтириш ҳамда бюджет барқарорлигини таъминлаш мақсадида амалга оширилмоқда.
