U-23 Осиё кубоги: Ўзбекистон Ливанни 3:2 ҳисобида мағлуб этди
“Оқ бўрилар” турнирдаги биринчи учрашувни ғалаба билан бошлади.
Бугун, 7 январь куни Равшан Ҳайдаров бошчилигидаги Ўзбекистон U-23 Олимпия терма жамоаси 2026 йилги Осиё кубогида ўз юришини Ливан устидан қозонилган 3:2 ҳисобидаги ғалаба билан бошлади. Учрашув Саудия Арабистонининг Ар-Риёд шаҳридаги “Шаҳзода Файсал бин Фаҳд” стадионида бўлиб ўтди. Бу ҳақда Трибуна хабар берди.
Ўйиннинг 23-дақиқасида Амирбек Саидов ҳисобни очиб, жамоани олдинга чиқарди. 50-дақиқада Равшан Хайруллаев ва 57-дақиқада Сардор Баҳромов гол уриб, Ўзбекистоннинг устунлигини мустаҳкамлади. Рақиб футболчиси Леонардо Шаҳин 65-дақиқада ҳисобни қисқартирди, аммо 90+5-дақиқада у дубл уриб, якуний натижани 3:2 га олиб келди.
Мазкур ғалабадан сўнг Ўзбекистон «С» гуруҳида пешқадамликни қўлга киритди. Гуруҳнинг биринчи ўйини Жанубий Корея ва Эрон ўртасида дуранг билан якунланган эди — 0:0. Турнир 2028 йилги Лос Анжелос Олимпиадасига тайёргарлик доирасида ўтказилмоқда, шу сабабли Ўзбекистон терма жамоаси У-21 таркибида иштирок этмоқда.
“Оқ бўрилар” навбатдаги учрашувини 10 январь куни Эрон терма жамоасига қарши ўтказади. Учрашув Тошкент вақти билан соат 19:00 да “Шаҳзода Файсал бин Фаҳд” стадионида бошланади.
