Роналду ва Жорже Жезус ярашиши мумкин: футболчининг жавоби кутилмоқда
Аввалроқ Роналду Португалия терма жамоаси йиғинини муддатидан олдин тарк этганди.
Португалия терма жамоаси бош мураббийи Жорже Жезус Криштиану Роналду билан юзага келган келишмовчиликни бартараф этиш учун учрашишга рози бўлди. Португалия футбол федерацияси томонидан таклиф қилинган учрашувга мураббий розилик билдирган, энди федерация Роналдунинг жавобини кутмоқда. Бу ҳақда A Bola хабар берди.
Маълумотларга кўра, учрашувни нейтрал ҳудудда ўтказиш режалаштирилган. Федерация Роналдунинг Португалия терма жамоасидаги фаолияти кескин тарзда якунланишининг олдини олиш ва томонлар ўртасидаги муносабатларни юмшатишга ҳаракат қилмоқда. Шу мақсадда футболчининг вакиллари билан ҳам музокаралар давом эттирилмоқда.
Аввалроқ 41 ёшли Роналду Португалия терма жамоаси йиғинини муддатидан олдин тарк этганди. Футболчи Данияга қарши учрашув олдидан кетган ва шундан сўнг ижтимоий тармоқларда жамоа йиғинини тарк этишга қарор қилганини маълум қилган. Португалия футбол федерацияси ҳам унинг йиғинни тарк этганини расман тасдиқлаган.
Роналду билан боғлиқ вазият бундан аввал ҳам федерация раҳбари Педро Проэнсанинг аралашувига сабаб бўлган. У Жезус ва Роналду билан алоҳида суҳбатлашиб, келишмовчиликни юмшатишга уринган.
Энди томонлар ўртасидаги кейинги қадам Роналдунинг жавобига боғлиқ. Агар у ҳам учрашувга рози бўлса, Португалия терма жамоаси атрофидаги сўнгги кунларда юзага келган зиддиятни музокара орқали ҳал қилиш имконияти пайдо бўлади.
