Аҳолини рўйхатга олишнинг иккинчи босқичи 4 февралдан бошланади
Регистраторлар хонадонма-хонадон юриб, маълумотларни электрон тизимга киритади.
2026 йилнинг 4–28 февраль кунлари аҳолини рўйхатга олиш тадбирининг иккинчи босқичи ўтказилади. Ушбу босқич доирасида рўйхатга олувчилар — маҳалла вакиллари томонидан хонадонма-хонадон юриш орқали маълумотлар йиғилади. Бу ҳақда Миллий статистика қўмитаси матбуот хизмати хабар берди.
Рўйхатга олиш жараёнида фуқаролар ҳақидаги маълумотлар планшет қурилмалари ёрдамида бевосита электрон тизимга киритилади. Бу маълумотларнинг аниқлиги ва тезкор қайд этилишини таъминлашга хизмат қилади.
Фуқаролардан хавфсизлик чораларига жиддий эътибор қаратиш сўралади. Агар хонадонингизга келган шахс рўйхатга олувчи эканлигига нисбатан шубҳа туғилса, ундан хизмат гувоҳномасини (бейджик) кўрсатишни талаб қилиш тавсия этилади.
Хизмат гувоҳномасида жойлаштирилган QR-код орқали регенератор (регистратор) ҳақидаги маълумотларни текшириш мумкин бўлиб, ушбу маълумотлар ягона электрон базага киритилган. Шунингдек, 1851 қисқа рақами орқали фаолият юритаётган кол-марказга қўнғироқ қилиб, регистратор тўғрисида қўшимча маълумот олиш мумкин.
Қайд этилишича, биринчи босқичда онлайн рўйхатдан ўтиб, сертификат олган айрим фуқаролар хонадонига ҳам регистраторлар ташриф буюриши мумкин. Бу ҳолат одатда онлайн анкета тўлдирилишида хатолик ёки етишмовчиликлар аниқлангани билан боғлиқ бўлади.
