Ўзбекистонда аҳолини рўйхатга олишнинг дастлабки натижалари 2026 йил 1 июлгача эълон қилинади
Якуний расмий статистик маълумотлар эса 2027 йил 1 июлгача тақдим этилади.
Ҳозирги вақтда мамлакатда аҳоли ва қишлоқ хўжалигини рўйхатга олиш тадбирининг иккинчи босқичи — анъанавий усулда, яъни хонадонма-хонадон юриб маълумот тўплаш жараёнлари давом этмоқда. Мазкур умумреспублика тадбири доирасида кенг кўламли статистик маълумотлар йиғилиб, уларни қайта ишлаш, текшириш ва таҳлил қилиш ишлари босқичма-босқич амалга оширилмоқда.
Мутахассислар таъкидлашича, рўйхатга олиш натижаларини эълон қилиш жараёни тўпланган маълумотлар ҳажми катта бўлгани сабабли маълум вақтни талаб этади. Халқаро тажрибада ҳам шунга ўхшаш тадбирларда якуний натижаларни қайта ишлаш ва эълон қилиш 2–3 йилгача давом этиши кузатилган.
Шу билан бирга, Ўзбекистонда маълумотларни киритиш босқичидаёқ замонавий мантиқий назорат механизмлари жорий этилган. Реал вақт режимидаги огоҳлантириш тизими орқали юзага келадиган хато ва камчиликлар дарҳол аниқланиб, тезкор тарзда бартараф этилмоқда. Бу эса умумий қайта ишлаш жараёнини сезиларли даражада тезлаштиришга хизмат қилмоқда.
Мазкур ёндашув асосида аҳолини рўйхатга олишнинг дастлабки натижаларини 2026 йил 1 июлгача эълон қилиш режалаштирилган. Тўлиқ таҳлил қилинган, якуний ва расмий статистик маълумотларни эса 2027 йил 1 июлгача жамоатчиликка тақдим этиш кўзда тутилган.
