Эпштейн ишида Трампни айблаган аёлнинг кўрсатмалари эълон қилинди

Эпштейн иши бўйича яқинда очиқланган ҳужжатларда бир аёлнинг Доналд Трампни жинсий жиноятларда айблаган баёнотлари ҳам ўрин олган. Бу ҳақда Reuters хабар берди.

 

Агентлик хабарига кўра, ҳужжатлар 5 март куни вазирлик расмий сайтида эълон қилинган. Федерал қидирув бюроси материалида 2019 йилда терговчилар номи ошкор қилинмаган аёлни Эпштейн иши юзасидан тўрт марта сўроқ қилгани келтирилган. 

 

Аввал Адлия вазирлиги фақат битта учрашув ҳақида қисқача маълумот берган эди. Ўша учрашувда аёл Эпштейн унга ўсмирлик пайтида тегажоғлик қилганини айтганди.

 

Янги ҳужжатларда аёл 1980 йилларда, яъни 13–15 ёшда бўлганида Эпштейн уни Трамп билан таништирганини ва Трамп уни ғайриинсоний жинсий алоқа қилишга мажбурлашга уринганини билдирган. Reuters бу даъволарни мустақил равишда тасдиқлай олмаган.

 

Оқ уй матбуот котиби эса ушбу айбловларни “мутлақо асоссиз ва ҳеч қандай ишончли далиллар билан тасдиқланмаган” деб атади. Адлия вазирлиги ҳам эълон қилинган материалларнинг бир қисмида Трампга нисбатан “ишончсиз ва шов-шувли даъволар” бўлиши мумкинлигини огоҳлантирган. Ҳужжатлар илгари “такрорий файллар” деб белгиланган 15 та ҳужжат орасида бўлганлиги сабабли эълон қилинмагани айтилган.

 

Эпштейн иши билан боғлиқ мазкур ҳужжатлар Конгресс босими фонида жамоатчиликка ошкор қилинмоқда. Демократлар Трамп маъмуриятини президентга алоқадор материалларни яширишда айбламоқда. 

 

Хусусан, CNN телеканали Эпштейн иши бўйича кейинги эълон қилинган ҳужжатларда айрим тергов маълумотлари “йўқолганини” билдирган эди.

 

АҚШ оммавий ахборот воситалари аноним даъвогар аёлнинг фуқаролик судларига бир неча бор даъво аризаси берганини хабар қилган. У ўсмир пайтида Трамп ва Эпштейн унинг нисбатан жинсий жиноятлар содир этганини иддао қилган, аммо даъволар кейинчалик қайтарилган ва судда кўриб чиқилмаган.

 

2008 йилда Жеффри Эпштейн вояга етмаган шахсни фоҳишаликка ундашда судланган, 2019 йилда эса аёллар, жумладан, вояга етмаганлар савдоси ва фоҳишаликка ундашда айбланган. Шу йили у қамоқхона камерасида вафот этган, унинг шериги Гислейн Максвелл эса кейинчалик 20 йиллик қамоқ жазосига ҳукм қилинган.