Ҳаво ифлосланиши хавфли чегарадан тўрт баравар ошди: аҳолига кислород автобусларда берилмоқда

Индонезияда ўрмон ёнғинлари туфайли ҳаво сифати кескин ёмонлашгани ва нафас йўллари касалликлари кўпайгани сабабли аҳолига бепул кислород берувчи махсус автобуслар йўлга қўйилди. Август ойидан 25 октябргача мамлакатда ёнғинлар билан боғлиқ қарийб 350 мингта нафас йўллари касалликлари ҳолати қайд этилган.

 

The Independent нашрининг ёзишича, Марказий Калимантан провинциясидаги Палангка Рая шаҳри маъмурияти кислород баллонлари ва тиббиёт ходимлари билан жиҳозланган автобусни ишга туширган. Унда нафас олишда қийналаётган фуқароларга махсус найча орқали 5–10 дақиқа давомида кислород берилади.

 

Индонезияда, айниқса, Суматра ва Борнео оролларида мавсумий ўрмон ёнғинлари тез-тез содир бўлади.  Жорий йилдаги ёнғинлар эса қарийб 11 йилдаги энг кучлиларидан бири бўлди. Ёнғинлардан тарқалган тутун мамлакат ичида нафас йўллари касалликларини кўпайтирган, шунингдек, Сингапур ва Малайзияда ҳаво сифатининг кескин ёмонлашишига сабаб бўлган.

 

Хабарларга кўра, Борнео ва Суматра ҳудудларида ҳаво ифлосланиши индекси 1 000 баллдан ошган. Бу хавфли деб ҳисобланадиган 300 баллик чегарадан тўрт баравардан ҳам юқори.

 

Марказий Калимантан провинцияси соғлиқни сақлаш бошқармаси маълумотига кўра, бепул кислород хизматидан камида 127 нафар бемор фойдаланган. Шунингдек, аҳоли ва ёнғинларни ўчиришда қатнашаётган ходимлар учун “кислород уйи” ҳам ташкил этилган.

 

Соғлиқни сақлаш вазирлиги маълумотларига кўра, августдан 25 октябргача мамлакатда ёнғинлар билан боғлиқ қарийб 350 мингта нафас йўллари касалликлари ҳолати қайд этилган. Шундан тахминан 31 минги Марказий Калимантан провинциясига тўғри келади.

 

Тутун оқибатида нафас олишда қийналаётган аҳолига ёрдам бериш учун тиббиёт ходимлари автобусда беморларни рўйхатга олиб, уларга кислород бермоқда. Хизматдан фойдаланган маҳаллий аҳоли вакиллари йўтал, кўкрак сиқилиши ва нафас қисиши каби аломатлар кузатилаётганини билдирган.

 

Айни пайтда мамлакатда ҳукуматнинг ёнғинларга қарши чораларини кучайтириш талаби билан норозилик намойишлари ҳам ўтказилмоқда. Ўтган ҳафта минглаб намойишчилар фавқулодда ҳолат эълон қилинишини талаб қилган. Уларнинг фикрича, бу қарор қўшимча маблағ ажратиш ва аҳолининг тиббий харажатларини қоплашга ёрдам бериши мумкин. Президент Прабово Субианто эса ҳозирча бундай қарор қабул қилмаган.