Путинга қарши суиқасд эҳтимоли туфайли унинг хавфсизлиги кучайтирилди — Financial Times
Кремлда давлат тўнтариши ва бир неча хавфлар туфайли хавотирлар кучайган.
Россия президенти Владимир Путин хавфсизлиги сўнгги ойларда кескин кучайтирилди. Бу ҳақда Financial Тimes'га таяниб, BBC хабар берди.
Маълум қилинишича, Федерал қўриқлаш хизмати томонидан давлат раҳбари қўриқланиши кучайтирилган. Манбаларнинг айтишича, Путин кўпроқ вақтни ерости бункерларида ўтказмоқда. Унинг изоляцияси COVID-19 пандемиясидан кейин янада ортган.
Нашрга кўра, март ойидан буён Кремлда суиқасд ёки давлат тўнтариши хавфи, хусусан дронлар орқали амалга оширилиши мумкин бўлган ҳужумлар билан боғлиқ хавотирлар кучайган. Бундай хавотирлар 2025 йилда Украина дронлари Россия ҳудудидаги ҳарбий объектларга ҳужум қилганидан сўнг янада ортган.
Манбаларга кўра, хавфсизликка оид ташвишлар Венесуэла раҳбари Николас Мадуро билан боғлиқ ҳолатлардан кейин ҳам кўпайган. Шу фонда Путиннинг расмий ташрифлари қисқартирилган, у билан шахсан учрашув ўтказадиган шахслар учун текширувлар кучайтирилган.
Шунингдек, мақолада Россия президенти ва унинг оиласи Москва вилояти ҳамда Валдайдаги резиденцияларига ташрифларни камайтиргани, давлат ОАВ эса вазиятни барқарор кўрсатиш учун олдиндан ёзиб олинган материаллардан фойдаланаётгани қайд этилган. Бироқ BBC ушбу даъволарни мустақил тасдиқлай олмаслигини билдирган.
FT ёзишича, президент атрофидаги ходимларга жамоат транспорти ва мобил қурилмалардан фойдаланиш бўйича қатъий чекловлар жорий этилган, уларнинг уйларига эса кузатув тизимлари ўрнатилган.
Нашр Москвада интернетнинг вақтинча ўчирилиши ҳам қисман хавфсизлик чоралари билан боғлиқ бўлиши мумкинлигини таъкидлайди. Шу билан бирга, куч тузилмалари ўртасида хавфсизликни таъминлаш масаласида ўзаро айбловлар ҳам юзага келгани айтилмоқда.
Манбаларга кўра, Путин ҳозирги кунда ўз вақтининг катта қисмини урушни бошқаришга сарфламоқда, ички сиёсат масалалари эса иккинчи даражага тушган.
