Коммунал қарзлар энди янги уй эгасига ўтмайдими?
Рақобат қўмитаси нотариал шартномалардан "эски қарздорликни янги эгасига юклаш" ҳақидаги бандни олиб ташлаш ташаббусини илгари сурмоқда.
Рақобатни ривожлантириш ва истеъмолчилар ҳуқуқларини ҳимоя қилиш қўмитаси кўчмас мулк олди-сотди жараёнларида мавжуд муҳим муаммога эътибор қаратди. Хусусан, айрим ҳолатларда уй сотиб олган фуқаролардан аввалги эгага тегишли бўлган коммунал қарзларни тўлаш талаб қилинаётгани қайд этилди.
Қўмита маълумотига кўра, бундай амалиёт “Истеъмолчилар ҳуқуқларини ҳимоя қилиш тўғрисида”ги қонун талабларига зид бўлиб, фуқароларнинг ҳуқуқларини чекловчи шартлар ҳисобланади.
Шу муносабат билан қўмита нотариал тасдиқланган кўчмас мулк олди-сотди шартномаларидан “қарз аниқланса, уни харидор тўлайди” мазмунидаги бандларни чиқариб ташлашни таклиф қилди.
Амалдаги тартибга кўра, кўчмас мулк битимлари НОТАРИУС ахборот тизими орқали текширилади ва қарздорлик мавжуд бўлмаган тақдирдагина тасдиқланади. Шунга қарамай, айрим ҳолларда биллинг тизимидаги хатоликлар ёки маълумотларнинг ўз вақтида янгиланмаслиги сабабли муаммолар юзага келмоқда.
Мисол сифатида Самарқанд вилоятида кузатилган ҳолатда, фуқаро уй сотиб олгач, унга 13 миллион сўмлик қарздорлик юклатилган. Текширув натижасида ушбу қарз аввалги эгага тегишли экани ва тизимдаги хатолик сабаб юзага келгани аниқланиб, фуқаронинг ҳуқуқлари тикланган.
Қўмита бундай ҳолатларнинг олдини олиш мақсадида тегишли вазирлик ва идораларга расмий таклифлар юборганини маълум қилди.
