Трамп Ҳормуз бўғозида қолиб кетган кемаларни чиқариш бўйича операция эълон қилди
АҚШ Президенти дунёнинг турли мамлакатлари кемаларини бўғоздан олиб чиқишда ундан ёрдам сўраганини айтди.
АҚШ президенти Доналд Трамп Ҳормуз бўғозида қолиб кетган хорижий кемаларни хавфсиз олиб чиқишга қаратилган махсус операция бошланишини маълум қилди.
У Truth Social ижтимоий тармоғидаги баёнотида “дунёнинг турли мамлакатлари” АҚШдан Ҳормуз бўғозида қолиб кетган кемаларини озод қилишда ёрдам сўраганини айтди. Унга кўра, Вашингтон мазкур давлатлар кемаларига ҳамроҳлик қилиб, уларни чекланган сув ҳудудидан хавфсиз чиқаришни режалаштирмоқда.
Оқ уй раҳбари таъкидлашича, “Озодлик лойиҳаси” деб номланган операция душанба куни эрталаб, Яқин Шарқ вақти билан бошланади. У бу ташаббусни АҚШ ва Яқин Шарқ мамлакатлари, “айниқса Эрон” иштирокида амалга оширилаётган гуманитар қадам сифатида баҳолади.
Шунингдек, Трамп Эрон билан музокаралар ижобий руҳда кечаётганини билдириб, бу мулоқотлар барча томонлар учун ижобий натижаларга олиб келиши мумкинлигини қайд этди.
Орадан кўп ўтмай, Эрон парламенти миллий хавфсизлик бўйича комиссияси раҳбари Иброҳим Азизи АҚШнинг Ҳормуз бўғозидаги вазиятга ҳар қандай аралашуви сулҳ режими бузилиши сифатида баҳоланишини маълум қилди.
