АҚШда самолёт қулаши оқибатида 5 киши ҳалок бўлди

АҚШнинг Техас штатида Pikcleball жамоасини мусобақага олиб кетаётган кичик самолёт ҳалокатга учради. Оқибатда бортда бўлган беш кишининг барчаси ҳалок бўлди. Бу ҳақда Fox News хабар берди.

 

Маҳаллий ҳокимият ва полиция маълумотига кўра, ҳодиса Остин шаҳридан тахминан 40 миль (64 км) жануби-ғарбида жойлашган Уимберли шаҳрида содир бўлган.

 

Полиция сержанти Билли Рейнинг маълум қилишича, самолётдаги учувчи ва тўрт нафар йўловчи воқеа жойидаёқ ҳалок бўлгани тасдиқланган. Ҳалок бўлганларнинг шахси ҳозирча ошкор этилмаган.

 

Расмийлар воқеа бўйича тергов ишлари АҚШ федерал авиация органлари томонидан олиб борилаётганини билдирди.

 

Маълум қилинишича, самолёт Техас штати Amarillo шаҳридаги Amarillo Pickleball Club аъзоларини турнирга олиб кетаётган бўлган. Клуб президенти Ден Даер ҳалок бўлганлардан тўрт нафари билан аввал ҳам кўп марта бирга ўйнаганини айтиб, уларни тажрибали ва ғалаба учун ҳаракат қилувчи спортчилар сифатида таърифлади.

 

Шу вақтда Амариллодан турнирга йўл олган иккинчи самолёт ҳам бўлган. Расмийларга кўра, у Ню-Браунфелс аэропортига муваффақиятли қўнган. Ҳаво ҳаракати диспетчерлари ёзувларига кўра, муаммога учраган самолёт радардан йўқолишидан олдин ноаниқ ҳаракатлар қилган.

 

Ҳодиса жойида самолётнинг фавқулодда сигнал тизими ишга тушгани қайд этилган. Шундан сўнг диспетчерлар 911 хизматига қўнғироқ қилган.

 

Миллий об-ҳаво хизмати маълумотига кўра, ҳодиса содир бўлишидан олдин ҳудудда осмон қисман булутли бўлган, кейинроқ эса момақалдироқли ёмғир кузатилган.

 

Уимберли ва Ню-Браунфелс шаҳарлари Техаснинг сайёҳлик билан машҳур Хилл Кантри ҳудудида жойлашган.