Навоийдаги хусусий боғчада болаларга зўравонлик қилган тарбиячи қамоққа олинди
Гумонланувчи ўз қарамоғидаги болаларни мунтазам калтаклаб келгани аниқланди.
Навоий шаҳридаги хусусий мактабгача таълим муассасасида болаларга нисбатан қўпол муносабатда бўлган тарбиячига жиноят иши қўзғатилди. Бу ҳақда вилоят Ички ишлар бошқармаси хабар берди.
Маълум қилинишича, Навоий шаҳридаги хусусий боғча тарбиячиси болаларни қийнаб, дўппослаганлик ҳолати акс этган видеохабарлар тарқалгач, ҳолат юзасидан Навоий вилояти Ички ишлар бошқармаси томонидан тезкор-суриштирув ишлари олиб борилган.
Воқеа жорий йилнинг 7 апрель куни Навоий шаҳри “Янгиариқ” МФЙ ҳудудида жойлашган, фуқаро С.С. раҳбарлигидаги хусусий боғчада содир бўлгани аниқланган.
Дастлабки маълумотларга кўра, мазкур муассасада тарбиячи бўлиб ишлаган 2003 йилда туғилган Э.Н. ўз қарамоғидаги болаларни “тартибга солиш” баҳонасида калтаклаган.
Шунингдек, ўрганишлар давомида гумонланувчи томонидан жорий йилнинг март ойидан апрель ойига қадар бўлган вақт оралиғида болаларни ўзини-ўзи ҳимоя қилиш имконияти чекланганлиги ва ожиз аҳволда эканлигидан фойдаланиб, дўппослаш ва зўрлик ишлатиб содир этиладиган бошқа ҳаракатлар билан муттасил равишда қийнаб келганлиги маълум бўлган.
Мазкур ҳолат юзасидан Э.Н.га нисбатан Навоий шаҳар ИИБ ҳузуридаги Тергов бўлими томонидан Ўзбекистон Республикаси Жиноят кодексининг 110-моддаси 2-қисми билан жиноят иши қўзғатилган ва фуқаро гумонланувчи тариқасида процессуал тартибда ушланган.
Ҳозирда дастлабки тергов ҳаракатлари олиб борилмоқда.
