Сурхондарёда ЙТҲ содир этиб, дугонасининг ўлимига сабаб бўлган қиз қамалди
Ҳайдовчи тезликни ошириб, автомобиль бошқарувини йўқотгани оқибатида транспорт воситаси йўлдан чиқиб, дарёга тушиб кетган.
Сурхондарё вилоятида юз берган йўл-транспорт ҳодисасида талаба қиз вафот этгани юзасидан суд ҳукми ўқилди.
Маълум қилинишича, 2025 йил 23 ноябрь куни соат 15:40 атрофида Тошкентдаги олий таълим муассасаларидан бирининг 4-босқич талабаси ўзига тегишли, бироқ ҳужжатлари расмийлаштирилмаган Cobalt автомобилида Шеробод–Тошкент йўналиши бўйлаб ҳаракатланган.
У узоқ сафарга ёлғиз чиқмаслик мақсадида ўзи билан бир олийгоҳда ўқийдиган танишини ҳам олиб кетган. Ҳаракатланиш давомида ҳайдовчи тезликни ошириб юбориб, автомобиль бошқарувини йўқотган. Натижада транспорт воситаси йўлдан чиқиб, Шеробод дарёсига тушиб кетган.
ЙТҲ оқибатида автомобилда йўловчи сифатида бўлган талаба қиз оғир тан жароҳатлари олиб, воқеа жойида вафот этган.
Суд ҳукмига кўра, ҳайдовчи Жиноят кодексининг 266-моддаси иккинчи қисми бўйича айбли деб топилди.
Унга барча турдаги транспорт воситаларини бошқариш ҳуқуқидан 3 йилга маҳрум этиш ҳамда 1 йил 6 ой муддатга озодликдан маҳрум қилиш жазоси тайинланди.
