Қашқадарёда кадастр ходими пора билан ушланди
Ходим фуқарога ер майдони учун қўлланилган жаримани бекор қилиб бермоқчи бўлган.
Қашқадарёда ер майдонларини ноқонуний сотиш билан боғлиқ ҳолатлар фош этилди. Бу ҳақда ДХХ хабар берди.
Маълум қилинишича, Давлат хавфсизлик хизмати вилоят бошқармаси ҳамда Иқтисодий жиноятларга қарши курашиш департаменти ходимлари ҳамкорлигида ўтказилган тадбирда Қарши туманидаги Кадастр агентлиги бўлими етакчи инспектори ушланган. У мансабдор танишлари орқали фуқаро томонидан ноқонуний эгаллаб олинган 12 сотих ер майдони учун қўлланилган 82 млн сўм жаримани бекор қилиш ва кадастр ҳужжатларини расмийлаштириш эвазига 2 минг АҚШ доллари олган вақтида ашёвий далиллар билан қўлга тушган.
Шу каби ҳолат Шаҳрисабз туманида ҳам қайд этилди. Унда муқаддам фирибгарлик жинояти учун судланган 59 ёшли шахс ҳамда Давлат кадастрлари палатаси туман филиали ходими ўзаро тил бириктириб, маҳаллий деҳқон хўжалигига тегишли 9 сотих ер майдонини бошқа шахс номига расмийлаштириб бериш эвазига 7 минг АҚШ доллари талаб қилган. Улар олдиндан 4 минг доллар олган вақтда қўлга олинган.
Ҳар икки ҳолат юзасидан жиноят ишлари қўзғатилган бўлиб, ҳозирда тергов ҳаракатлари олиб борилмоқда.
