Қашқадарёда лолазорни пайҳон қилган ҳайдовчилар жаримага тортилди
Ҳуқуқбузарларнинг ҳар бирига базавий ҳисоблаш миқдорининг 50 баравари миқдорида жарима тайинланди.
Қашқадарё вилоятининг Кўкдала туманида лолазор ҳудудида автомобилларда ҳаракатланган шахслар аниқланиб, уларга нисбатан чоралар кўрилди.
Қайд этилишича, ижтимоий тармоқларда тарқалган видеода транспорт воситаларининг лолазор ҳудудида ҳаракатлангани акс этган. Ҳолат юзасидан ўтказилган ўрганишлар давомида ҳуқуқбузарлар аниқланиб, уларга тегишли автомобиллар жарима майдончасига жойлаштирилган.
Мутасаддилар ҳисоб-китобига кўра, мазкур ҳуқуқбузарлик натижасида табиатга 6 миллион 592 минг сўм миқдорида зарар етказилган. Шунингдек, уч нафар ҳуқуқбузарнинг ҳар бирига базавий ҳисоблаш миқдорининг 50 баравари — 20 миллион 600 минг сўмдан, жами 61 миллион 800 минг сўм жарима тайинланган.
Ҳуқуқбузарлар белгиланган тартибда жарима ва етказилган зарарни қоплашлари лозим.
