Тошкентда электр тармоқлари корхонаси муҳандислари 8 минг доллар пора билан ушланди
Улар тадбиркорнинг 400 миллион сўмлик жаримасини камайтириб бериш учун пул талаб қилган.
Тошкент шаҳри туманларидан бирида фаолият юритувчи электр тармоқлари корхонасининг икки нафар муҳандиси пора олишда гумон қилиниб ушланди. Бу ҳақда Zamon.uz'га ДХХ хабар берди.
Маълум бўлишича, улар тижорат банк филиали биносида ўрнатилган электр ҳисоблагич нотўғри схема орқали тармоққа улангани сабаб электр энергияси нотўғри ҳисобланаётгани ҳақида далолатнома расмийлаштирган. Шундан сўнг, ҳисоблагични ўрнатган масъул МЧЖ раҳбаридан мазкур далолатнома бўйича ҳисобланган 400 миллион сўм жаримани 65 миллион сўмга камайтириб бериш эвазига 8 минг АҚШ доллари талаб қилган.
Тезкор тадбир давомида Давлат хавфсизлик хизмати Тошкент вилояти бўйича бошқармаси ҳамда Иқтисодий жиноятларга қарши курашиш департаменти ходимлари томонидан муҳандислар пул маблағини учинчи шахс орқали олган вақтда қўлга олинди.
Ҳозирда мазкур ҳолат юзасидан жиноят иши қўзғатилган бўлиб, тергов ҳаракатлари олиб борилмоқда.
