Ўзбекистонда энг кўп бола туғиладиган ҳудудлар маълум қилинди
Туғилиш даражаси бўйича Сурхондарё ва Қашқадарё етакчилик қилди.
Миллий статистика қўмитаси 2025 йил якунлари бўйича Ўзбекистонда туғилиш даражаси ҳақидаги маълумотларни эълон қилди.
Унга кўра, мамлакат бўйича ўртача туғилиш кўрсаткичи ҳар 1000 нафар доимий аҳолига 23,2 нафарни ташкил этган.
Ҳудудлар кесимида энг юқори кўрсаткичлар Сурхондарё вилоятида — 27,5 ҳамда Қашқадарё вилоятида — 27,1 этиб қайд этилди.
Шунингдек, Самарқанд вилоятида туғилиш даражаси 24,5, Жиззахда 24,1, Наманганда 23,9 ва Фарғонада 23,5 бўлган.
Андижон вилоятида мазкур кўрсаткич 22,8, Хоразмда 22,5, Сирдарёда 22,4, Навоийда 21,9, Бухорода 20,9 ҳамда Тошкент вилоятида 20,5 ни ташкил этган.
Пойтахт Тошкент шаҳрида туғилиш даражаси мамлакат ўртача кўрсаткичидан паст бўлиб, ҳар минг аҳолига 19,8 нафарни ташкил қилган.
Энг паст кўрсаткич эса Қорақалпоғистон Республикасида қайд этилиб, ҳар 1000 аҳолига 19,2 туғилиш тўғри келган.
