Тошкент—Хива йўналишидаги янги тезюрар поезд қатнови 3 майдан йўлга қўйилади
“Жалолиддин Мангуберди” электропоезди ҳафтасига 3 кун қатнаб, сафар вақти 7,5 соат атрофида бўлади.
Тошкент—Хива йўналишида янги “Жалолиддин Мангуберди” номли юқори тезликдаги электропоезд қатнови йўлга қўйилмоқда. Мазкур йўналиш бўйича чипта нархи бир томонга 780 минг сўм этиб белгиланган.
Ўзбекистон темир йўллари маълумотига кўра, поезд Тошкент Марказий вокзалидан соат 07:00 да жўнаб, Хивага 14:31 да етиб боради. Хивадан Тошкентга қайтиш рейси эса соат 07:20 да йўлга чиқиб, 14:51 да пойтахтга етиб келади.
Қатновлар ҳафтасига уч кун амалга оширилади. Тошкентдан Хивага поезд сешанба, пайшанба ва шанба кунлари ҳаракатланса, Хивадан Тошкентга чоршанба, жума ва якшанба кунлари қатнайди.
Янги йўналиш бўйича илк қатнов 3 май куни Тошкентдан, 4 май куни эса Хивадан амалга оширилади. Йўловчилар чипталарни темир йўл кассалари орқали ёки электрон шаклда махсус платформа орқали харид қилишлари мумкин.
