Ўзбекистон мусулмонлари идораси қабристонларни обод қилишга чақирди

Ўзбекистон мусулмонлари идораси Уламолар кенгаши қабристонларни обод қилиш ва зиёрат одобларига оид мурожаатини эълон қилди.

 

Мурожаатда қайд этилишича, мамлакатда аждодларни хотирлаш, уларнинг хотирасини эъзозлаш ҳамда қабристонларни обод қилиш эзгу анъана сифатида қаралади. Шунингдек, муқаддас динимизда марҳумларни зиёрат қилиш, уларнинг ҳаққига дуо қилиш ва қабрларга ҳурмат билан ёндашиш тарғиб этилгани таъкидланган.

 

Идора баёнотида яқин йилларда юрт бўйлаб, жумладан, Самарқандда Имом Бухорий мажмуаси атрофида кенг кўламли ободонлаштириш ишлари амалга оширилгани эслатиб ўтилган.

 

Шунингдек, қабристонлар инсонни тафаккурга чорловчи, ҳаётнинг ўткинчилиги ва охират ҳақиқатини эслатувчи маскан экани таъкидланган.

 

Идора айрим ҳудудларда қабристонларнинг қаровсиз қолиши, тозалик ва тартиб-интизом етарли даражада эмаслиги каби ҳолатларга ҳам эътибор қаратган. Бундай ҳолатлар марҳумлар хотирасига нисбатан бефарқлик сифатида баҳоланаётгани билдирилган.

 

Мурожаатда қабристонларни доимий равишда тоза ва обод сақлаш, зиёрат маданиятига риоя қилиш ҳамда белгиланган тартибларга амал қилиш зарурлиги қайд этилган.

 

Шунингдек, зиёрат вақтида покликка риоя қилиш, салом бериш, дуо ва Қуръон тиловати қилиш, қабрларга ҳурматсиз муносабатда бўлмаслик каби одоблар эслатиб ўтилган.

 

Бундан ташқари идора қабристонларни обод қилиш ва зиёрат маданиятини юксалтириш мақсадида “Қабристонларни обод қилиш долзарб ойлиги” ташаббусини эълон қилди.

 

Унга кўра, маҳалла аҳолиси, нуронийлар, имом-хатиблар ва зиёлилар қабристонларни тозалаш ва ободонлаштириш ишларига кенг жалб этилади.

 

Ташаббус доирасида қабристонларни тартибли сақлаш, кўкаламзорлаштириш, зиёратчилар учун қулай шароит яратиш ҳамда ёшлар ўртасида “Хотира ва қадрлаш” тушунчасини мустаҳкамлаш режалаштирилган.