АҚШда “Аллигатор Алкатраз” қамоқхонаси ёпилиши мумкин
Марказ ҳукуматга кунига 1 миллион доллардан ортиқ харажат келтираётгани қайд этилди.
АҚШ маъмурияти Флорида штатида жойлашган “Аллигатор Алкатраз” номли миграция ҳибсхонасини ёпиш масаласини кўриб чиқмоқда. Бу ҳақда Флорида губернатори Рон Десантис маълум қилди дейди TASS.
Унинг таъкидлашича, муассаса фаолиятини якунлаш бўйича масала ҳозирда муҳокама босқичида бўлиб, янги Ички хавфсизлик департаменти раҳбари ҳам вазиятни қайта кўриб чиқмоқда.
Дастлаб ноқонуний иммиграцияга қарши кураш модели сифатида тақдим этилган ушбу марказ кейинчалик юқори харажатлар ва самарадорликка оид саволлар сабабли танқид остида қолган. Маълумотларга кўра, унинг ишлаши кунига 1 миллион доллардан ортиқ маблағ талаб этади.
“New York Times” нашри хабарига кўра, музокаралар дастлабки босқичда бўлиб, муассасанинг иқтисодий жиҳатдан самарасиз экани қайд этилган.
“Аллигатор Алкатраз” 2025 йил ёзида очилган бўлиб, у аллигаторлар ва заҳарли илонлар яшайдиган ботқоқлик ҳудудида жойлашганлиги билан ҳам эътиборни тортган. Дастлаб у келгусидаги шунга ўхшаш марказлар учун намуна сифатида кўрилган эди.
