БАА Ҳормузни айланиб ўтувчи нефть қувурини ишга туширмоқчи
Бу орқали Фужайра портидан нефть экспорт қилиш қуввати икки бараварга оширилиб, Ҳормуз бўғозига қарамлик камаяди.
Бирлашган Араб Амирликлари Ҳормуз бўғозига боғлиқликни камайтириш мақсадида янги нефть қувури қурилишини жадаллаштиришга қарор қилди. Бу ҳақда Reuters хабар берди.
Abu Dhabi Media Office маълумотига кўра, Абу-Даби валиаҳди шайх Холид бин Муҳаммад бин Зоид ADNOC давлат нефть компаниясига West-East Pipeline лойиҳасини тезлаштириш бўйича топшириқ берган. Ҳозирда қувур қурилиши давом этмоқда ва уни 2027 йилга қадар ишга тушириш режалаштирилган.
Янги лойиҳа орқали Фужайра портидан нефть экспорт қилиш қуввати икки бараварга оширилади. Бу эса БААга нефтни Ҳормуз бўғозидан ўтказмасдан, Уммон кўрфази орқали жаҳон бозорига чиқариш имконини кенгайтиради.
Ҳозирда мамлакатдаги Hab–Fujairah (ADCOP) нефть қувури кунига 1,8 миллион баррелгача нефть ташиш қувватига эга. Мазкур қувур Форс кўрфазидаги кескин вазият шароитида БАА учун стратегик аҳамият касб этмоқда.
Форс кўрфази давлатлари орасида фақат БАА ва Саудия Арабистони Ҳормуз бўғозини четлаб ўтувчи экспорт йўналишларига эга.
Февраль ойи охирида АҚШ ва Исроилнинг Эронга қарши зарбаларидан кейин Теҳрон Ҳормуз бўғозидаги ҳаракатни амалда чеклаган. Одатда жаҳон нефтининг қарийб бешдан бири айнан шу йўлак орқали ташилади.
Сўнгги ойларда минтақадаги танкерларга ҳужумлар ва нефть инфратузилмаларига зарбалар ҳам қайд этилган. Шу фонда БАА экспорт хавфсизлигини таъминлаш учун муқобил йўналишларни кучайтиришга уринмоқда.
