Хусанов “Манчестер Сити”да мавсумнинг энг яхши футболчиси соврини учун даъвогарлик қилмоқда
Саралаш босқичида жамоа футболчилари иштирок этиб, якуний уч номзод аниқланган.
Абдуқодир Хусанов Англиянинг Манчестер Сити клубида мавсумнинг энг яхши футболчиси унвони учун якуний учликка киритилди. Бу ҳақда клуб мавсум якунлари бўйича эълон қилган рўйхатда маълум қилинган.
Номзодлар қаторида, шунингдек, ярим ҳимоячи Нико ЎРайли ва вингер Жереми Доку ҳам бор. Дастлаб жамоа ичида ўтказилган овоз бериш босқичида барча футболчилар иштирок этган, сўнгра саралаш натижасида учта асосий номзод ажратиб олинган.
Қайд этилишича, Хусанов аввалроқ мавсум давомида уч марта “ойнинг энг яхши футболчиси” деб топилган — 2025 йил февраль, 2026 йил январь ва март ойларида. Бу натижалар унинг якуний мукофот учун асосий даъвогарлардан бири бўлишига замин яратган.
Эндиликда мавсумнинг энг яхши футболчиси мухлислар овоз бериши орқали аниқланади.
