Қабристонларни ободонлаштиришга 3 йил учун 1,6 трлн сўм ажратилади
Ҳар бир қабристон учун алоҳида шахсий ҳисобварақ очилади ва хайрия маблағларини қабул қилиш учун QR-код тизими жорий этилади.
Вазирлар Маҳкамаси қабристонларни ободонлаштириш ишларини тизимли ташкил этиш бўйича янги қарор қабул қилди. Бу ҳақда ЎзА хабар берди.
Қарорга асосан, Ўзбекистондаги 10 мингдан ортиқ қабристонни таъмирлаш ва ободонлаштириш учун 2027–2029 йилларга мўлжалланган дастур доирасида жами 1,6 трлн сўм йўналтирилади.
Қарорда қабристонларнинг ҳимоя деворлари, кириш дарвозалари, бино-иншоотлари ҳамда ички йўл ва йўлакларини таъмирлаш ва қуриш ишлари белгиланган тартибда молиялаштирилиши кўзда тутилган. Бунда маблағлар маҳаллий бюджет, ҳомийлик ва хайрия маблағлари ҳамда қонунчиликда тақиқланмаган бошқа манбалардан шакллантирилади.
Шунингдек, ҳар бир қабристон учун алоҳида шахсий ҳисобварақ очилади ва хайрия маблағларини қабул қилиш учун ҚР-код тизими жорий этилади. Тушган маблағлар фақат қабристонларни сақлаш ва ободонлаштириш ишларига йўналтирилади.
