Наркотик савдоси: трансмиллий жиноий уюшма аъзолари ушланди

Самарқанд вилоятида 235 минг дозага тенг 55 кг 750 грамм опий ва гашиш гиёҳвандлик воситаларининг республика ҳудудида тарқатилишига чек қўйилди. Наркотик моддаларни контрабанда йўли билан олиб киришга уринган икки нафар йирик наркокурер қўлга олинди.

 

Ички ишлар вазирлиги, унинг ҳудудий бўлинмалари ҳамда Давлат хавфсизлик хизмати ходимлари ҳамкорлигида ўтказилган тезкор-қидирув тадбири давомида гумондорлар Самарқанд вилоятининг Тойлоқ тумани ҳудудидаги дала майдонида қўлга олинган.

 

Маълум қилинишича, улар «Ласетти» русумли автомобилда келиб, белгиланган геолокацияда яшириб кетилган 41 кг 200 грамм опий ва 14 кг 550 грамм гашиш гиёҳвандлик воситаларини олаётган бўлган.

 

Тезкор суриштирув натижаларига кўра, қўлга олинган шахслар бир йилдан буён республика ҳудудида гиёҳвандлик воситаларини тарқатиш билан шуғулланиб келган. Улар кейинчалик наркотик моддаларни қўшни республикада яшовчи раҳнамоларининг топшириғига биноан, кўрсатилган шахсларга тақсимлаб, ҳудудларга етказиши керак бўлган.

 

Мазкур ҳолат юзасидан гумонланувчиларга нисбатан Жиноят кодексининг 273-моддаси 6-қисми «а» банди билан жиноят иши қўзғатилган.