Пойтахтда ҳаво сифати ёмонлашиши кутилмоқда: асосий сабаблар маълум қилинди

3 ноябрга ўтар кечаси Тошкент шаҳрида атмосфера ҳавосининг ифлосланиш даражаси ошиши мумкин. Прогнозларга кўра, кечки соатларда ҳаво сифати халқаро AQI индекси бўйича сезгир гуруҳлар учун носоғлом даражага етади, соат 23:00 дан кейин эса ифлосланиш кучайиши кутилмоқда.

 

Маълум қилинишича, тунда ҳаво сифати халқаро индекс бўйича "носоғлом", миллий индекс бўйича эса асосан "сариқ" даражада бўлади.

 

Бунга тунда ҳароратнинг пасайиши, шамолнинг кучсизлиги ва кучли ҳарорат инверсияси сабаб бўлиши мумкин. Ушбу омиллар атмосфера қуйи қатламларида ҳаво алмашинувини чеклаб, PM2.5 ва PM10 заррачаларининг ер юзасига яқин ҳудудларда тўпланишига шароит яратади.

 

Шунингдек, ҳаво массаларининг сўнгги суткада шаҳар атрофида секин ҳаракатлангани ҳам ифлослантирувчи моддалар тарқалишини қийинлаштирмоқда.

 

Прогнозларга кўра, 3 ноябрь куни тонгда ҳаво сифати аста-секин яхшиланиши мумкин. Қуёш чиққач, ҳарорат кўтарилиши ва ҳаво алмашинуви яхшиланиши натижасида ҳарорат инверсияси кучсизланади.

 

Тошкент шаҳрида атмосфера ҳавоси сифатини мониторинг қилиш ишлари махсус комиссия томонидан давом эттирилмоқда.