Эммануэл Макроннинг қароргоҳида тинтув ўтказилди
Парижнинг молиявий жиноятлар бўйича икки тергов судьяси президент қароргоҳида процессуал ҳаракатларни амалга оширган.
Франциянинг Le Monde нашри хабарига кўра, Эммануэл Макроннинг расмий қароргоҳи — Élysée Palace'да давлат харидлари билан боғлиқ тергов доирасида тинтув ўтказилди.
Маълум қилинишича, 21 май куни Парижнинг молиявий жиноятлар бўйича икки тергов судьяси президент қароргоҳида процессуал ҳаракатларни амалга оширган. Тергов Пантеондаги хотира маросимларини ташкил этиш учун тузилган давлат шартномалари билан боғлиқ ҳолатлар юзасидан олиб борилмоқда.
Нашр маълумотига кўра, тергов марказида маросимларни ташкил этиш билан шуғулланган Shortcut Events компаниясига бир неча давлат буюртмаларининг берилиши масаласи турибди. Мазкур тадбирлар сўнгги йилларда давлат раҳбари иштирокида ўтказилган.
Шунингдек, хабарда қайд этилишича, жорий йил 14 апрель куни ҳам терговчилар Елисей саройида тинтув ўтказишга уринган, бироқ президент маъмуриятига оид биноларнинг дахлсизлиги билан боғлиқ конституциявий меъёрлар сабаб уларга киришга рухсат берилмаган.
Тергов доирасида аввалроқ Centre des Monuments Nationales ташкилоти, Shortcut Events компанияси офислари ҳамда ишга алоқадор шахсларнинг уйларида ҳам тинтувлар ўтказилгани айтилмоқда.
Ҳозирча Франция президенти администрацияси мазкур тергов юзасидан расмий изоҳ бермаган.
