Таиландга 60 кунлик визасиз кириш тартиби бекор қилинди
Мамлакатга кириш визасини онлайн расмийлаштириш талаб этилади.
Таиланд ҳукумати мамлакатга визасиз кириш ҳамда чегарада виза расмийлаштириш (Visa on Arrival) тизимига ўзгартириш киритиш таклифини маъқуллади. Бу ҳақда “Дунё” ахборот агентлиги хабар берди.
Ҳужжатга мувофиқ, 2024 йил 15 июлдан бери 93 давлат фуқаролари, жумладан Ўзбекистон фуқаролари учун амал қилаётган 60 кунлик визасиз тартиб бекор қилинади.
Қарор Таиланднинг расмий “Royal Gazette” нашрида эълон қилинганидан 15 кун ўтиб кучга киради. Ҳужжат келаси ҳафта эълон қилиниши кутилмоқда.
Янги тартибларга кўра, Ўзбекистон фуқаролари эндиликда Таиландга визасиз кира олмайди. Мамлакатга кириш учун визани thaievisa.go.th портали орқали онлайн расмийлаштириш талаб этилади.
