Tailand sayyohlarga vizasiz bo‘lish muddatini 30 kungacha qisqartirmoqchi
Hukumat tashabbusi migrantlar bilan bog‘liq shikoyatlar fonida ilgari surilayotgani aytilmoqda. Tailand o‘zbekistonliklar eng ko‘p sayohat qiladigan 10 ta davlatdan biridir.
Tailand Tashqi ishlar vazirligi xorijlik sayyohlar uchun vizasiz qolish muddatini 60 kundan 30 kungacha qisqartirish bo‘yicha taklifni Vazirlar Mahkamasiga tasdiqlash uchun kiritadi. Bu haqda Reuters xabar bermoqda.
Agentlik yozishicha, Tashqi ishlar vaziri Sihasak Puangketkeo ushbu o‘zgarish qachondan kuchga kirishi aniq belgilanmaganini ma’lum qilgan.
“Bizningcha, 60 kun — ehtimol juda uzoq muddat bo‘lib, ayrim shaxslar vizasiz rejimdan noqonuniy maqsadlarda foydalanmoqda. Biz nazoratni kuchaytirishni xohlaymiz”, — dedi vazir.
Uning so‘zlariga ko‘ra, vizasiz qolish muddatini qisqartirish bo‘yicha taklif avvalgi ma’muriyat davridayoq ishlab chiqilgan, biroq saylovlar sababli uni ko‘rib chiqish kechiktirilgan.Hozirda mazkur tashabbus yuzasidan tegishli idoralar bilan maslahatlashuvlar o‘tkazilishi rejalashtirilgan.
Tashqi ishlar vazirligi rahbari esa ushbu taklifning qabul qilinishida jiddiy to‘siqlar bo‘lishini kutmayotganini ta’kidlagan.
Bundan tashqari, bir qator viza toifalarini qayta ko‘rib chiqish zarurati ham qayd etilmoqda, chunki amaldagi tizimda viza turlari juda ko‘p bo‘lib, ularning ayrimlarini birlashtirish imkoniyati mavjud. Mamlakat bosh vaziri Anutin Charnvirakul ushbu qoidalarni qayta ko‘rib chiqish uchun maxsus ishchi guruh tuzish bo‘yicha ko‘rsatma bergan.
Bloomberg xabariga ko‘ra, hukumatning bu tashabbusi ayrim mahalliy biznes vakillarining migrantlar tomonidan noqonuniy faoliyatlar ortib borayotgani va bu holat ularning daromadlariga salbiy ta’sir ko‘rsatayotgani haqidagi shikoyatlariga javoban amalga oshirilmoqda.
Tailand 2024-yil iyul oyidan boshlab 93 ta davlat fuqarolari uchun vizasiz rejimni joriy etgan edi.2026-yil 1-yanvardan 10-maygacha bo‘lgan davrda Tailand 12,4 million xorijiy sayyohni qabul qilgan bo‘lib, bu o‘tgan yilning shu davriga nisbatan 3,43 foizga kamdir.
Turizm mamlakat iqtisodiyotining muhim tarmog‘i hisoblanadi va 2019-yilda xorijiy sayyohlar oqimi qariyb 40 millionga yetgan.
Ma’lumot uchun, Tailand hukumati O‘zbekiston fuqarolari uchun 2024-yil yozida 60 kungacha vizasiz kirish rejimini rasmiy ravishda joriy etgan. Kutilayotgan o‘zgarishning O‘zbekistonga ta’siri bo‘yicha hozircha rasmiy ma’lumotlar mavjud emas. 2026-yilning dastlabki 3 oyida 13 839 nafar o‘zbekistonlik Tailandga borgan.
Abdullayeva Shaxrizoda
