Республика бўйича 10 193 та мактабда “Сўнгги қўнғироқ” тадбирлари ўтказилди

 

2026 йил 25 май куни мамлакатимиздаги барча умумтаълим мактабларида “Юксак маърифатли авлод — Учинчи Ренессанс пойдевори” шиори остида “Сўнгги қўнғироқ” тадбирлари ўтказилди.

 

Мазкур тадбирларда республика бўйича жами 10 193 та давлат умумтаълим мактаби иштирок этиб, 4 миллиондан ортиқ ўқувчи қатнашди.

 

Тадбирлар аввалида Ўзбекистон Президентининг мамлакатимиз умумтаълим мактаблари битирувчи ўғил-қизларига йўллаган байрам табриги ўқиб эшиттирилди.

 

Шундан сўнг битирувчи ўқувчиларга тантанали равишда олтин ва кумуш медаллар топширилди ҳамда уларнинг келгуси фаолиятига муваффақият тиланди.

 

Тадбирлар доирасида йил давомида намунали хулқи ва аъло баҳоларга ўқиган иқтидорли битирувчилар рағбатлантирилди. Шунингдек, фаол иштирок этган ота-оналар “Энг фаол ота”, “Жонкуяр она”, “Масъулиятли ота-она” каби номинациялар бўйича тақдирланди.

 

Маълумотларга кўра, жорий ўқув йили якунида 11-синфни 472 436 нафар, 9-синфни эса 621 894 нафар ўқувчи тамомламоқда.

 

Шундан 9-синф битирувчиларининг 605 408 нафарига оддий, 16 486 нафарига аъло даражали шаҳодатнома берилади. 11-синф битирувчиларининг эса 2 047 нафари кумуш, 9 731 нафари олтин медаль билан тақдирланади, қолган 460 658 нафарига оддий аттестат топширилади.

 

2019 йилдан бошлаб иқтидорли битирувчиларни қўллаб-қувватлаш мақсадида олтин ва кумуш медаллар билан тақдирлаш тизими жорий этилган.

 

Шунингдек, сўнгги йилларда таълим тизимида амалга оширилаётган ислоҳотлар натижасида педагог ходимларнинг малакаси, стажи ва фаолиятига қараб иш ҳақига қўшимча устамалар тизими йўлга қўйилди. 2026 йилда ушбу тизим асосида 24 289 нафар педагог 10 миллиондан 20 миллион сўмгача ойлик иш ҳақи олмоқда.

 

Ўқувчиларнинг ютуқлари ҳам сезиларли даражада ортиб бормоқда. Хусусан, 2025 йилда халқаро мусобақаларда 210 та медаль (40 та олтин, 78 та кумуш, 92 та бронза), 2026 йил май ойига қадар эса 108 та медаль (20 та олтин, 37 та кумуш, 51 та бронза) қўлга киритилди.

 

Жорий йилнинг I чорагида эса халқаро, минтақавий ва нуфузли фан олимпиадаларида 27 та медаль (5 та олтин, 10 та кумуш, 12 та бронза) қўлга киритилди.

 

Мактабгача ва мактаб таълими вазирлиги ахборот хизмати