Самарқандда Epica темир тўсиққа урилди: ҳайдовчи ҳалок бўлди
Ҳайдовчи эътиборсизлиги оқибатида руль бошқарувини йўқотиб, ЙТҲга учраган.
Самарқанд вилоятининг Иштихон туманида Epica русумли автомобиль иштирокида йўл-транспорт ҳодисаси содир бўлди. Оқибатда ҳайдовчи воқеа жойида вафот этди.
Вилоят Йўл ҳаракати хавфсизлиги бошқармаси маълумотига кўра, ҳодиса 2026 йил 27 октябрь куни соат 21:00 ларда Д-076 автомобиль йўлининг 80-километрида, «Қўнғирот» маҳалласи ҳудудида юз берган.
Epica ҳайдовчиси Иштихон–Пайшанба йўналишида ҳаракатланаётиб, эътиборсизлиги оқибатида руль бошқарувини йўқотган ва йўлнинг ўнг томонидаги темир тўсиққа урилган.
Оқибатда ҳайдовчи оғир тан жароҳатлари олиб, воқеа жойида вафот этган.
Ҳолат юзасидан Иштихон тумани ИИБ Тергов бўлими томонидан жиноят иши қўзғатилиб, дастлабки тергов ҳаракатлари олиб борилмоқда.
Эслатиб ўтамиз, аввалроқ Қашқадарё вилоятининг Шаҳрисабз туманида VAZ-2105 русумли автомобиль дарахтга урилиши оқибатида 20 ёшли ҳайдовчи вафот этгани хабар қилинган эди.
