Қашқадарёда текширувни “босди-босди” қилишни ваъда қилган ИИБ ходими ушланди
У диний мазмундаги тақиқланган материаллар бўйича текширувни ижобий ҳал қилиш учун пора сўраган.
Қашқадарё вилоятида диний мазмундаги тақиқланган материаллар билан боғлиқ текширувни “ижобий ҳал қилиб бериш” эвазига пора олган ИИБ ходими қўлга олинди. Бу ҳақда Zamon.uz'га ДХХ хабар берди.
Маълум бўлишича, Деҳқонобод туманида яшовчи 1983 йилда туғилган аёл ва унинг 2009 йилда туғилган қизининг телефонларида диний мазмундаги тақиқланган материаллар аниқлангани юзасидан вилоят ИИБ томонидан текширув ҳаракатлари олиб борилган.
Терговга қадар текширув жараёнларини танишлари орқали уларнинг фойдасига ҳал қилиб беришни ваъда қилган 1978 йилда туғилган шахс 3 млн сўм олган вақтида ушланган.
Шундан сўнг тезкор тадбир давом эттирилиб, ушбу масалани ижобий ҳал қилиш эвазига воситачидан 2,5 млн сўм олган вақтида Қашқадарё вилояти ИИБ Тезкор қидирув хизмати тезкор вакили ашёвий далиллар билан қўлга олинган.
Ҳозирда ИИБ ходимига нисбатан Жиноят кодексининг 210-моддаси (пора олиш), воситачига нисбатан эса 212-моддаси (пора олиш-беришда воситачилик қилиш) билан жиноят иши қўзғатилган. Тергов ҳаракатлари олиб борилмоқда.
