Венесуэлада маҳбуслар исён кўтариб, қамоқхонани эгаллаб олишди

 

Венесуэланинг Баринас штатида жойлашган INJUBA қамоқхонасида маҳбуслар иштирокида оммавий норозилик ва тартибсизлик ҳолати юз берди.

 

Нодавлат “Қамоқхоналарни мониторинг қилиш маркази” (Observatorio Venezolano de Prisiones) маълумотига кўра, воқеа 24 май эрталаб давлат мадҳияси янграганидан сўнг бошланган. Қамоқхонадаги 1300 дан ортиқ маҳбус, жумладан аёллар ҳам иштирок этган ҳолда иш ташлаш эълон қилган.

 

Норозилик давомида айрим маҳбуслар қамоқхона биноси томларига чиқиб, матрас ва бошқа буюмларни ёқиб юборган. Вазият кескинлашганидан сўнг қамоқхона ҳудудида ўқ овозлари эшитилгани, шунингдек, кўздан ёш оқизувчи газ қўллангани ҳақида хабарлар тарқалган.

 

Маълумотларга кўра, маҳбусларнинг яқинлари Миллий гвардия бўлинмаларининг қамоқхонага киришини тўсишга уринган, бироқ бу уринишлар муваффақиятсиз якунланган. Тартибсизликлар вақтида қамоқхона ҳудудида портлашлар ва ўқ отиш ҳолатлари кузатилгани билдирилмоқда.

 

Шунингдек, 120 дан ортиқ маҳбус якка тартибдаги камераларда сақлангани, қамоқхона маъмурияти томонидан ҳам хавфсизлик чоралар доирасида ўқ узиш ҳолатлари қайд этилган.

 

Тергов ҳибсхонасининг қўшимча биносида кўздан ёш оқизувчи газ қўлланиши оқибатида юздан ортиқ аёл маҳбуснинг аҳволи ёмонлашгани, уларга бошқа маҳбуслар томонидан ёрдам кўрсатилган.

 

Дастлабки маълумотларга кўра, тартибсизликларнинг асосий сабаби қамоқхона янги раҳбари томонидан жорий этилган кескин ва қатъий ички тартиб-қоидаларга нисбатан норозилик бўлган.