Рақобат қўмитаси Қурбон ҳайитида озиқ-овқат нархларни оширмасликка чақирди
Савдо тармоқлари нарх ўзгаришлари ҳақида қўмитани тезкор хабардор қилиб боради.
Рақобат қўмитаси йирик савдо тармоқлари ҳамда республика ҳудудларидаги савдо комплексларига Қурбон ҳайити арафасида ижтимоий аҳамиятга эга озиқ-овқат маҳсулотлари нархларини барқарор сақлаш юзасидан мурожаат йўллади.
Қўмита матбуот хизматига кўра, байрам арафасида талаб кескин ортиши мумкин бўлган асосий озиқ-овқат маҳсулотлари нархларининг асоссиз ошиб кетишининг олдини олиш, етказиб берувчилар томонидан нарх ўзгаришлари, логистика харажатлари ҳамда бошқа омиллар ҳақида қўмитага тезкор маълумот тақдим этиб бориш бўйича тегишли кўрсатмалар берилган.
Шунингдек, чакана савдо тармоқлари ва ҳудудлардаги савдо комплекслари етказиб берувчи корхоналарни асоссиз нарх ошириш ҳолатларига йўл қўймаслик юзасидан огоҳлантириб бориши зарурлиги таъкидланган.
Рақобат қўмитаси аҳоли учун муҳим бўлган ижтимоий аҳамиятга эга озиқ-овқат маҳсулотлари нархларининг барқарорлигини таъминлаш бўйича ўз ваколатлари доирасида зарур чораларни кўриб боришини маълум қилган.
