Ўзбекистоннинг ЖЧдаги ўйинлари 220 та мактабда намойиш этилади
Мамлакат бўйлаб умумтаълим мактабларида “Мухлислар майдони” лойиҳаси ташкил этилади.
Жорий йилнинг июнь–июль ойларида бўлиб ўтадиган футбол бўйича Жаҳон чемпионати давомида Ўзбекистон миллий терма жамоасини қўллаб-қувватлаш мақсадида мамлакат бўйлаб умумтаълим мактабларида “Мухлислар майдони” лойиҳаси ташкил этилади. Бу ҳақда Мактабгача ва мактаб таълими вазирлиги хабар берди.
Лойиҳа доирасида 220 та мактабда футбол томошалари учун зарур шароитлар яратилади ҳамда Ўзбекистон терма жамоасининг Жаҳон чемпионатидаги ўйинлари катта экранларда жонли эфирда намойиш этилади.
Мазкур масканларда ўқувчилар, ота-оналар ва барча футбол ихлосмандлари терма жамоа учрашувларини биргаликда томоша қилиш имкониятига эга бўлади.
Маълумот учун, Ўзбекистон терма жамоасининг гуруҳ босқичидаги ўйинлари Тошкент вақти билан қуйидаги жадвал асосида ўтказилади:
Ўзбекистон — Колумбия (18 июнь, соат 07:00);
Ўзбекистон — Португалия (23 июнь, соат 22:00);
Ўзбекистон — Конго (28 июнь, соат 04:30).
