Италияда тўрт нафар мигрант машинасида тириклайин ёқиб юборилди

 

Италиянинг Калабрия минтақасидаги Амендолара шаҳрида содир бўлган мудҳиш жиноят оқибатида тўрт нафар мигрант ҳалок бўлди. Маҳаллий прокуратура маълумотларига кўра, ҳодиса юзасидан икки нафар Покистон фуқароси оғирлаштирувчи ҳолатлардаги қотилликда гумонланиб ҳибсга олинган.

 

The Guardian'нинг маълум қилишича, фожиа ёқилғи қуйиш шохобчаси ҳудудида содир бўлган. Кузатув камералари тасвирларида гумонланувчилар автомобилга ёнувчи суюқлик сепиб, сўнг унга ўт қўйгани акс этган. Дастлабки маълумотларга кўра, автомобил эшиклари қулфлангани сабабли ичкаридаги шахслар ташқарига чиқа олмаган.

 

Ҳодиса оқибатида уч нафар Афғонистон ва бир нафар Покистон фуқароси ҳалок бўлган. Автомобилдаги яна бир афғонистонлик эркак эса юкхона орқали чиқиб кетишга муваффақ бўлган. У куйиш жароҳатлари билан қутқариб қолинган.

 

Омон қолган шахснинг сўзларига кўра, у ва ҳалок бўлган ҳамкасблари қишлоқ хўжалиги ишларида меҳнат қилган. У айрим шахслар томонидан мунтазам таҳдидлар бўлгани ва мигрантлар меҳнатидан ноқонуний фойдаланилгани ҳақида кўрсатма берган.

 

Аввалроқ, АҚШда НУЖ тадқиқотлари билан шуғулланган 11 та олим бедарак йўқолгани ҳақида хабар берилган эди.