Андижонда 4 нафар эгизак туғилди
Кўп ҳомилали туғруқ натижасида уч ўғил ва бир қиз дунёга келди.
Андижон вилоятида истиқомат қилувчи аёл бир йўла 4 нафар эгизак — уч нафари ўғил ва бир қизалоқ дунёга келтирди. Бу ҳақда Соғлиқни сақлаш вазирлиги маълум қилди.
Қайд этилишича, Республика ихтисослаштирилган она ва бола саломатлиги илмий-амалий тиббиёт марказининг Андижон вилояти филиалида ноёб туғруқ муваффақиятли амалга оширилган.
Андижон шаҳридаги “Ғайрат” маҳалла фуқаролар йиғинида яшовчи Одинахон Муҳаммаджонова 2-июн куни кўп ҳомилали ҳомиладорлик ташхиси билан мазкур тиббиёт муассасасига ётқизилган. Бир неча кунлик тиббий кузатувдан сўнг муддатидан олдин туғруқ ташхиси асосида кесарча кесиш амалиёти ўтказилган.
Туғруқ жараёни малакали акушер-гинекологлар, неонатологлар ва реаниматологлар иштирокида муваффақиятли якунланган. Натижада уч нафар ўғил ва бир нафар қизалоқ дунёга келган.
Чақалоқларнинг вазни мос равишда 2415 грамм, 1730 грамм, 2405 грамм ва 1885 граммни ташкил этган.
Мутахассислар маълумотига кўра, айни пайтда она ва чақалоқларнинг саломатлик ҳолати қониқарли бўлиб, улар шифокорлар назорати остида парвариш қилинмоқда.
