Италияда Исроил вазирига нисбатан тергов бошланди
Тергов Ғазо секторига инсонпарварлик ёрдами етказиш мақсадида йўлга чиққан “Сумуд” флотилиясининг қўлга олиниши билан боғлиқ.
Италия прокуратураси Исроилнинг миллий хавфсизлик вазири Итамар Бен-Гвирга нисбатан тергов бошлади. Суриштирув Ғазога гуманитар ёрдам олиб бораётган “Сумуд” флотилияси фаолларининг қўлга олиниши ва уларга нисбатан муомала билан боғлиқ ҳолатлар юзасидан олиб борилмоқда. Бу ҳақда Италиянинг Аnsа агентлиги хабар берди.
Маълумотларга кўра, Рим прокуратураси томонидан олиб борилаётган тергов Исроилнинг Ашдод Порт портида сақланган фаоллар билан боғлиқ воқеаларни қамраб олади. Хусусан, қўлга олинганларнинг қўллари орқадан боғланган ҳолда сақлангани ҳақидаги маълумотлар ўрганилмоқда.
Тергов доирасида Исроил куч тузилмаларининг кемаларни тўхтатиш, кўздан кечириш ва фаолларни ҳибсга олиш жараёнидаги ҳаракатлари ҳам текширилмоқда. Ушланганлар орасида Италия фуқаролари ҳам бўлгани айтилмоқда.
Маҳаллий ОАВ маълумотларига кўра, терговчилар эҳтимолий қийноқлар, ноқонуний ҳибс ва одам ўғирлаш билан боғлиқ айбловларни ҳам кўриб чиқмоқда. Фаоллар манфаатларини ҳимоя қилаётган адвокатлар айрим ҳибсга олинганлар қийноққа солингани ва жинсий зўравонликка дуч келганини даъво қилган.
Эслатиб ўтамиз, май ойида Ғазо секторига инсонпарварлик ёрдами етказиш мақсадида йўлга чиққан “Сумуд” флотилияси халқаро сувларда Исроил ҳарбий-денгиз кучлари томонидан тўхтатилган эди. Исроил Ташқи ишлар вазирлиги ўшанда 430 нафар фаол қўлга олинганини маълум қилган.
Шунингдек, Италия прокуратураси аввалроқ халқаро сувларда Италия фуқароларининг қўлга олиниши ҳолати юзасидан ҳам алоҳида тергов бошлаган эди. Ҳодиса бўйича учта расмий шикоят келиб тушгани билдирилган.
