Мудофаа тизими ходимларининг маоши 70 фоизгача оширилади

 

Ўзбекистонда ҳаво ҳужумидан мудофаа тизимлари, юқори аниқликдаги қуроллар ҳамда ҳарбий авиацияни самарали қўллашга қаратилган янги ислоҳотлар амалга оширилади. Бу ҳақда Мудофаа вазири Шуҳрат Холмуҳаммедов маълум қилди.

 

Қайд этилишича, Президент томонидан 8 июн куни имзоланган фармонга мувофиқ, Ҳаво ҳужумидан мудофаа қўшинлари ва Ҳарбий ҳаво кучлари қўмондонлиги негизида Ҳарбий-ҳаво кучлари жанговар қўмондонлиги ташкил этилади.

 

Мазкур қарор ҳарбий авиация имкониятларини янада кенгайтириш, қўшинларнинг жанговар шайлигини ошириш ҳамда замонавий таҳдидларга тезкор жавоб қайтариш тизимини такомиллаштиришга қаратилган.

 

Фармон билан юқори аниқликдаги қуроллар билан жиҳозланган авиация техникалари, учувчисиз авиация комплекслари ва замонавий ҳарбий воситалар билан қуролланган янги бўлинмаларни ташкил этиш бўйича аниқ вазифалар белгиланган.

 

Шунингдек, ҳужжатда ҳарбий хизматчилар ва мудофаа ишлари органлари фуқаро ходимларининг ижтимоий ҳимоясини кучайтириш чоралари ҳам назарда тутилган. Жумладан, Тошкент ва Самарқанд шаҳарларида хизмат қилаётган ҳарбий хизматчиларга турар жой ижараси учун тўланадиган пул компенсацияси 25 фоизга оширилади.

 

Бундан ташқари, мудофаа ишлари органлари фуқаро ходимларининг иш ҳақи 2026 йил 1 июлдан 20 фоизга, 2027 йил 1 январдан эса қўшимча равишда яна 50 фоизга оширилиши белгиланди.